恭喜哂呀！女神一個又一個咁封盤，今次就到。。。
話說做過藝訓班校長鄭丹瑞日前就喺IG上載去陳華鑫婚禮嘅相，仲話：「第26期藝訓班嫁女，恭喜Gloria！即使遠在布吉擺酒，也要第一時間飛去恭賀。在回程的飛機上，忽然想起：我總共教了四屆，有接近100個學生，他／她們都會結婚，成家立室，單單在送禮金這件小事上，憑我那份微薄的藝訓班校長薪水，豈不是嘔凸？！沒有向電視台申請加人工，真失策！」
不過結婚係開心事，而主人翁陳華鑫後來都喺IG上載結婚時與媽媽相擁的照片：「Mama I love you」真係好令人感動！
事後就問到Gloria，佢就話同老公圈外男友周國榮拍拖6年，「其實同佢拍拖嘅時候已經會諗結婚，上年佢就同我求婚，一齊去籌備1年，就去咗布吉搞婚禮。」陳華鑫之前入紙申請結婚，都冇特別透露幾時會擺酒，佢自己都話為人低調：「其實身邊啲人都一直知道我有拍拖嘅，但係我份人唔係幾想鋪張，所以結婚都冇特別請好多人，都係請親戚同埋幾個特別好嘅朋友。」而圈中朋友，Gloria就請咗同期藝訓班嘅李旻芳、譚永浩等。
而Gloria覺得最感動嘅一刻，就係老公唱歌畀佢聽：「佢一直以嚟都唔係好唱歌，所以今次都好想聽，我估就估中咗佢唱《喜歡你》。」而Gloria喺婚禮就冇爆喊，但依然好感動，內心嘅眼淚就好想湧出嚟。
(HK01)
