今屆金像獎由ViuTV直播，原來仲有玄機0架…
因為本屆金像獎司儀，係由~登凳！張繼聰同蔡卓妍（Sa）擔任司儀。試諗下，以張繼聰同無綫依家嘅關係，如果金像獎由無綫播……到時畫面會唔會令人以為得阿Sa一個司儀㗎——當然係，唔會啦！講番正題。本屆金像獎將於4月15日晚，假座香港文化中心大劇院舉行，今日大會仲宣佈埋本屆專業精神獎得主，就係人稱茶水蓮姐嘅楊容蓮女士（蓮姐/Pauline）！致敬！楊容蓮女士於八十年代已加入香港電影工業工作，主管茶水部，曾參與超過百齣香港電影，一直默默為香港電影幕後工作服務，為幕後的重要人員，電影業界人人敬重。
呢啲暖水壺，都係蓮姐嘅心血
阿Sa同張繼聰特登到片場探蓮姐報喜，蓮姐一臉難以置信：「係咪真0架？」梗係真啦！張繼聰話：「蓮姐為我哋貢獻好多，冬天有熱咖啡飲，夏天有凍咖啡飲，多謝晒Pauline！」全場拍掌，向蓮姐致謝。
恭喜蓮姐！
好溫馨呀！好似媽咪同仔女攬住咁！
（Apple Daily）
