三女之母張新悅上年去咗一間慈善機構工作，要返朝9晚5，嗰時佢仲話夜晚會少咗時間陪佢哋，不過今日佢就喺facebook宣佈，屋企會再多一個小朋友喇。
今日張新悅喺facebook貼咗一條片，係佢自己自編自導自演嘅「電台」訪問，佢一開始就話：「近日好多人發現我拒絕佢哋嘅活動，特別係夜晚嘅派對，更有人覺得我好唔畀面佢哋，同佢哋飲番杯酒，所以想借呢個自編自導自演嘅『電台』訪問，我想講聲抱歉，令大家有所誤會。」之後條片就係一首張新悅自家製作嘅歌，首歌叫做《一不小心2018大肚婆》，就係講佢自己有咗第四胎，首歌仲有埋MV，全家總動員出動拍攝加出演，老公同3個囡囡都落力演出。
首歌除咗話自己有第四胎之外，仲有呻自己做媽媽嘅辛酸，但都有啲有趣位，其中一句係咁：「一不小心又有咗囉，感覺很惆悵，明明話3個夠，點知俾老公呃咗。」其中仲有歌詞講到未知係仔定女，仲話仔女都冇所謂。條片貼咗出嚟之後，好多網民都恭喜佢。記者問過張新悅有關第四胎嘅事，佢就回覆話：「完全冇諗過生第四個，睇完條片都知係唔小心，做三個嘅媽咪已經好辛苦，估唔到個天畀多次挑戰我，希望小朋友健康，其實本來想好低調處理呢件事，但街上嘅人開始發現我個肚凸出嚟，佢哋覺得我好似好肥咁，我接受唔到人話我肥，咁唯有話畀大家聽啦，因為生到第四個，又好耐冇填過詞喇，咁一家一齊玩下都好開心，輕輕鬆鬆咁接受呢個事實，個人會樂觀啲啦。」張新悅又呢首歌係送畀所有大肚婆同埋各位媽媽，佢話：「我都第四個，我都有經驗同感受，相信大家都會好認同。」講到老公，佢就話老公已經諗緊名：「佢好興奮，好似個小朋友咁，興奮過我一百倍，而我就好惆悵同好嬲佢。」
仲有少少呻出街要兩部的士
（Apple Daily）
