今日天氣好凍，唔少人都鍾意飲熱嘢暖身，好似人妻謝安琪（Kay）食完醒神早餐後，就諗住慢慢歎番杯咖啡，點知飲飲吓期間，竟唔小心倒瀉杯咖啡，仲要搞到成身一陣味！
之後，Kay喺社交網用咗三百幾字、以《咖啡色的人》為題撰寫咗篇文章，佢憶述：「一早起身幫張生整完早餐 送佢出門口之後 自己都整返（番）份早餐 黎（嚟）個金絲雀feel 坐係（喺）窗門邊慢慢嘆（歎） 自以為悠然自得之際 唔小心倒瀉左（咗）杯凍咖啡+Protein Shake 可能天氣太凍定唔知乜 又或者係我性格太悠閑（閒） 啲咖啡濕到入去底底 我先至扶得返（番）正隻杯 呢種倒瀉野（嘢）飲 並唔係一般倒瀉少少嗰種 而係成張舒服椅同附近地下 同埋我成隻左腳 由大腿到小腿 全部都係咖啡咁狀況。」
Kay 以新詩模式詳述被咖啡淋全身經過
Kay續說：「一向樂觀積極嘅我 一邊覺得好凍 一邊痞（踎）係（喺）地下抺 立下（吓）眼望吓杯咖啡仲有大約1/3杯 仲覺得好開心仲有少少可以飲 就係（喺）呢個時候 唔知係太開心定係抹得太投入 我個頭又撞到張枱仔 剩返（番）果（嗰）半杯仔咖啡 就係咁兜頭淋左（咗）落黎（嚟） 我諗連做咖啡師既（嘅）朋友 都好少會有由頭到腳都一陣咖啡味嘅經驗 其實我真係好鍾意飲咖啡 我好開心自己有一個咖啡色的人生。」仲Hashtag「#我和咖啡有個約會 #咖啡色的大半身 #咖啡色的一生」，成件事真係好有戲劇性…網友睇完後一方面好同情Kay，另一方面亦忍唔住笑咗出嚟。
另外，Kay老公張繼聰昨晚就喺社交網晒出一張合照，透露同Kay帶咗一班小朋友去嘉年華玩，見佢哋個個都玩得好開心，唔知Kay係咪因為玩得太攰兼休息不足，而搞到今朝咁失魂呢？
Kay自嘲係「咖啡色的人」。
Kay昨晚同老公張繼聰帶咗一班小朋友去嘉年華玩。
玩得好開心！
（Instagram / ON.CC）
