33歲從未拍拖，但甩肉25kg後情竇初開，被爆深夜密會。。。
鄭欣宜最近疑遭不法商人，利用佢嘅肖像推銷減肥產品，欣宜所屬公司噚日已發聲明，指呢個假廣告嘅內容全屬揑造、不實，對於被不法之徒盜相做假廣告之違法手段絕不姑息，除咗會作出追究之外，更呼籲網民切勿誤信此減肥廣告。
原來欣宜之外，「細細粒」陳嘉佳都中招！細細粒體重高峰期達260磅，廣告內容話佢係王祖藍嘅接班人，33歲從未拍拖，但甩肉25kg後情竇初開，被爆深夜密會外國猛男……云云。嘩，講到似層層，當然要搵當事人細細粒求證一下。
細細粒今日接受《蘋果》電話訪問時就叫大家千祈唔好相信，佢話﹕「一，我一定唔會鍾意外國猛男，因為我英文都唔識多句，如果有呢張相，我都想睇吓係邊個。二，我都唔係33歲，係32歲。」細細粒話從來冇做過減肥代言人，係最近有幾位朋友先後問佢該產品係咪咁好用，佢先知事態嚴重。細細粒話﹕「一星期有四、五個朋友打嚟問，唔澄清唔得。我冇用過就唔好誇大，呢啲減肥藥都唔知有冇攞合法證書，女仔身體好重要，傷到個子宮就好大件事。我亦都有同公司講咗，未知佢哋點處理。」
細細粒透露現在體重100kg，約220磅，為健康亦有意減肥，佢話﹕「十幾歲時就覺得一定要瘦，但呢個年齡減肥都係以健康為主，諗住遲啲搵營養師加埋中醫調理，但過埋新年先，冬天減肥好辛苦架，太多美食誘惑，哈哈。」
(蘋果日報)
