「而我不知道陳偉霆是誰」已經out晒啦，陳偉霆o依家喺大陸當紅小生，微博粉絲人數超過二千萬，但唔係人人都咁好彩，有機會走紅。
與陳偉霆同屬英皇嘅洪卓立，唔經唔覺都入咗娛樂圈12年，到o依家都未有乜代表作。唉，洪卓立今日喺ig仲講咗一段唔知係可笑定可悲嘅真人真事，佢寫咗一段同的士哥嘅對話﹕
的士大哥﹕「無綫呢排唔見你嘅？」
洪﹕「我唔係無綫㗎嘛」
的﹕「哦！之前成日見你喺無綫出現。」
洪﹕「間唔使上吓㗎姐(啫)。」
的﹕「嗰時你同林嘉欣最西(犀)利。」
睇完以上對話，相信唔止洪卓立有好多問號，相信大家都有少問號，因為林嘉欣都冇簽畀無綫，咁究竟的士哥認錯洪卓立做邊個呢？
洪卓立都忍唔住留言反問：「咁我到底係邊個？」唔少網民推測司機叔叔應該係認錯人＋講錯名，仲估到有三個答案：
1.認錯洪卓立係林峯、林嘉欣應該係鍾嘉欣；
2.認錯洪卓立係黎明、林嘉欣應該係李嘉欣；
3.認錯洪卓立係吳業坤、林嘉欣應該係龔嘉欣。
答案應該只有的士哥先知。
(蘋果日報)
