明明之前仲好Sweet咁。。。
現年28歲嘅何佩瑜（Jeana）前年中爆出戀上大10年、憑電影《踏血尋梅》彈起嘅導演翁子光，兩人相戀一年多，前年底跨年拍拖出遊蜜月勝地馬爾代夫，兩人嬉水作樂，男方仲操刀幫Jeana影低噴血寫真，但係Jeana噚日突然喺Instagram留言：「謝謝你。感恩這幾個月大家已經找到了最舒服的相處模式。好朋友。一切美好和回憶。」仲貼出同翁子光一張過去合作舊照，「回憶」兩字正暗示情已逝。
Jeana跟翁子光戀情曝光，兩人曾孖咇出席過首映，做慣幕後嘅翁子光因為不擅回應戀情，一度要女友承受很大壓力，翁子光前年曾歉疚喺facebook留言：「從今只想跟你甘苦與共，願你的微笑伴我朝暮至老。」又喺留言後tag了Jeana話：「PS對不起親愛的，我的怯懦和不善言令你獨自承受了被追問的壓力，我為了你的勇敢和擔當而感恩，以後有甚麼我願一起分擔。」兩人相戀最初的確甜蜜蜜，有指男方工作太忙，不時離港開戲，忽略女友，所以佢哋分手導火線係聚少離多，感情變淡。
《蘋果》噚日致電Jeana求證分手一事，佢透過短訊回覆：「我們已經是朋友的關係一段時間，大家都有繼續互相關心聯繫。」Jeana坦承分手，至於分手原因，佢話：「我們發現維持好朋友的關係更加合適舒服。」問到Jeana幾時分手？佢避談：「都有一段時間。」兩人有復合機會嗎？Jeana話：「將來的事將來再算，沒有人知道，但是我知道他怎樣也是我的好朋友，關係只會有增無減。」
兩人之間有冇出現第三者？Jeana強調：「當然沒有第三者。」如果對方將來先拍拖，可會酸溜溜？Jeana大方話：「只要是大家開心快樂，怎樣也互相祝福。」回復單身嘅Jeana，o依家身邊有冇追求者？佢話：「冇呀，隨緣啦！」翁子光跟Jeana拍拖時，成日以電影做話題，Jeana直認男友教導自己好多，去年底翁子光執導由郭富城及梁朝偉兩大影帝孭飛電影《風再起時》（前名《全球追緝令》），呢套戲劇情交待香港兩大華人探長嘅傳奇，男仔戲份重，Jeana獲派演偉仔老婆，喺廣州開鏡拜神時，Jeana同偉仔，各自着復古婚紗同禮服現身，成為傳媒焦點。Jeana當時話好高興同偉仔呢前輩合作，仲笑言俾佢電暈。
無約嘅Jeana有幸演偉仔老婆，為佢演藝事業推上高點，但作偏呢個間甩拖，將來電影上再碰舊愛會尷尬嗎？Jeana回覆：「不會尷尬，你和朋友合作會尷尬嗎？」Jeana明明為分手有感而發，但「鴨王」何浩文（Dominic）卻搭錯線留言：「sweet！」Jeana無語回覆「………….」Dominic再留言：「朋友唔會分手，有更好更舒服嘅相處模式同感覺，比有衝突地相處要更好。所以sweet！」
(蘋果日報)
