藝人陳凱琳（Grace）及劉佩玥（Moon）以和服Look到葵芳出席活動，Grace說：「我細個都有着過和服，係比較簡單嗰種，唔似得今日呢套有咁多層要着，就好似我之前拍《翻生武林》着咁多層衫。（男友鄭嘉穎有冇讚你着得靚？）頭先準備出場好忙，應該有影到相，但未send畀佢睇呀！陣間我都要返去開劇，我諗到農曆新年之前都係拍劇為主！」
Moon早前被指幫周志文（大孖）屋企手湊B，已成功融入男方家中，問到有否保持聯絡，她說：「有，梗係有啦，我哋朋友嚟㗎嘛，開心嘅！（有冇機會發展？）呢個問題，Grace你平時點答？我覺得呢個世界咩都有可能，我唔會抹殺任何機會，對於感情我順其自然，如果有嘅再同大家講。」
Moon被問到有否帶周志文返屋企見家長？她說：「呢樣嘢我媽都有講過，佢話可唔可以唔好亂咁帶男仔返嚟，因為佢依家唔知係咪年紀大，成日撈亂我同細佬個名，有時又嗌咗佢細佬個名，費事第時引起啲咩誤會，個男仔無啦啦聽到另一個男仔名，以為我好花心，咁不如等我發展得耐啲，拍咗幾年拖先帶啦！費事畀人誤會我帶好多男仔返屋企！（你媽咪識唔識周志文？）好似見過，有次喺中環成班人一齊玩，佢好鍾意踩場！（監視你？）冇喎，佢覺得我暫時都識得處理嘅！」
(on.cc東網)
