藝人寶珮如（Baby）到灣仔拍攝奇妙電視賀年節目，Baby話新年不會登台：「老公唔會放過我啦！都係留喺屋企同老爺、奶奶過傳統嘅新年。」素顏上陣的她自爆今個新年未必可以開心地過：「因為我免疫力出咗問題呀，變得好差，我依家生緊玫瑰痤瘡，令眼瘡都生得好嚴重，幾日之前做咗手術，但就淨係刮除咗入面減輕咗先，下眼線位嗰度就未可以做住，因為醫生話有三分一機會破相，我之前車禍已經破過一次相㗎喇嘛，所以依家就好忐忑囉，唔知博唔博好。你見我依家戴太陽眼鏡，因為我唔可以化妝，又要戴冷帽保暖，唔可以畀自己病，嚟緊仲要食幾個月藥，好擔心新年，因為唔可以開開心心同好靚咁過，新年願望就係希望身體健康，快啲好番。」
真係要好好休息！
問到自己如何調節心情，Baby話會保持心境開朗：「醫生叫我唔好做太多運動，因為免疫力已經唔好就唔好再chur佢，同埋要保持心境開朗啦，唔好有壓力同埋要注重清潔，（老公點樣安慰你？）老公好好呀，依家我大晒，佢唔敢畀壓力我，我盡量用正能量來面對。（好多嘢唔會得？）係呀，海鮮同煎炸嘢都唔食得，仲有我最愛嘅雞蛋都唔食得，因為容易發，而家盡量都係煲啲健康湯水。（新年會好好休息？）都一樣會周圍去，派下利是，過年之後都會接啲唱歌嘅工作。」
左眼明顯有粒大瘡！
擔心死老公！
(ON.CC)
