歐瑞偉喺第1輯處境劇《愛‧回家》開始合作，由上司下屬演變到舅父外甥嘅前港男李偉健，呢個搞笑組合好受觀眾歡迎，hehe味完全入晒屋。
但係喺現實生活中，佢哋一啲都唔hehe，KC歐瑞偉本身已經有一個靚老婆，劇中飾演外甥Terry嘅李偉健喺舊年9月出席活動時候，曾經講過話希望向拍咗拖好多年嘅圈外女友求婚，踏入2018年，終於傳出喜訊！
今日有周刊報道，李偉健終於成家立室，有傳佢向劇組請假，將會喺今年3月同女友去旅行結婚，一切低調進行。不過歐瑞偉接周刊訪問，佢話已經收咗Terry嘅通知，但係佢遲啲要去大陸拍《包青天》，所以未必可以出席婚禮。歐瑞偉仲讚Terry好乖仔，亦都見過佢嘅女友，性格好文靜。李偉健今日亦都有傳媒訪問，佢承認將結婚：「多謝晒，暫時只係打算旅行結婚，知期內未定會唔會擺酒。」
（蘋果日報）
