出爐視帝王浩信緋聞不絕，喺頒獎禮當日有蔡思貝奮不顧身咁中斷訪問，由後台跑出錄影廠，眼甘甘咁望住王浩信喺台上講得獎感言，以行動支持，但已有家室嘅王浩信明顯比較避忌，話晒早前同蔡思貝被傳過從甚密，導致形象一度插水，o依家當然係老婆陳自瑤同囡囡緊要好多喇，似乎急於劃清界線。
點知一波未平，一波又起，今日周刊指王浩信早前同「宅男女神」江嘉敏去英國拍《兄弟》外景，成日一齊玩，江嘉敏一向好主動撩合作嘅男演員，有時同啲男演員會玩到郁手郁腳，喺英國開工期間，江嘉敏經常買咖啡俾王浩信。
有工作人員向報道爆料指，江嘉敏返港後，同王浩信人前扮唔熟，但係喺片場就差唔多發短訊，江嘉敏有時仲會提早返去探班，又傳王浩信介紹眼科醫生俾佢，事後江嘉敏喺Ig貼自拍相，留言：「獨⋯⋯眼⋯⋯龍，邊個話唔痛㗎喂，同我企出嚟！」未知係唔係王浩信只係教導新人。
此外，報道又指老婆陳自瑤同王浩信囡囡靖喬喺頒獎禮前，約咗樂易玲於銅鑼灣食飯，席間有傳陳自瑤落力於樂小姐面前讚老公，呢個老婆都算唔話得，又要照顧囡囡、又要開工拍劇，仲要為老公默默付出。
(蘋果日報)
