現年37歲嘅前女歌手愛內里菜已於2010年離開娛樂圈發展，上個月佢突然亮相節目公開近況，透露自己做咗單親媽媽，囝囝現年已經2歲，佢話同囝囝爸爸分開咗先發現有喜，決定獨力撫養囝囝，節目公開後佢獲得外界送上支持。
不過最新一期雜誌《女性自身》卻報道，愛內里菜其實係愛上有婦之夫，對方係於大阪經營公司嘅A先生，現時愛內里菜嘅寓所就係A先生所有，男方現時仍與太太同住，但不時到愛內里菜寓所過夜。
報道指愛內里菜經常為A先生遲遲未同太太離婚而嘈交，但由於佢唔可以捨棄富貴生活，兩人仍未斬纜，而佢哋過兩人世界時，愛內里菜多數會將囝囝交畀娘家照顧，雜誌記者追訪兩人於新年假期去咗泰國玩，當時愛內里菜都冇預囝囝。
對於被指做情婦，愛內里菜就否認，只係話對方係一直支持自己嘅人。
(蘋果日報)
