大台處境劇《愛．回家之開心速遞》似乎造就咗一對真．戀人。
蘇韻姿同阮政峰喺嘉年華手拖手，好甜蜜。(左圖﹕讀者阿融提供 ; 右圖﹕資料圖片)
「紅衫魚」蘇韻姿同「池子孝」阮政峰早前喺社交網站上載「愛的手勢舞」，跳得非常合拍，阮政峰仲偷吻咗蘇韻姿一啖，唔少網友覺得佢哋係戲假情真。佢哋接受訪問時死口唔認拍拖，話呢刻只係工作拍檔，但唔排除發展可能。
雖然佢哋死口唔認拍拖，但行為舉止真係勁似一對戀人。(讀者阿融提供)
情深對望。(讀者阿融提供)
女主角好冧
手拖手
早前蘇韻姿同阮政峰孖住戲中另一對「Bonnie」林凱恩同「金城安」周嘉洛一齊去中環嘅AIA嘉年華，當晚林凱恩都有喺網上玩直播，不過兩對「戀人」就男女分得好開，蘇韻姿全程黐住林凱恩，之後林凱恩同周嘉洛就影咗啲偽情侶照放上IG，順便宣傳下套劇。鏡頭以外，《蘋果》讀者阿融日前透露「爆相爆片」話當日見到蘇韻姿同阮政峰好煙韌。
林凱恩同周嘉洛(背面)就幫佢哋影相。(讀者阿融提供)
林凱恩當日有喺網上玩直播，全程見到蘇韻姿黐實林凱恩。 (網絡截圖)
真正男友即使有合照都隔好遠。 (網絡截圖)
「Bonnie」林凱恩同「金城安」周嘉洛大方喺網上貼手拖手相，但似為劇宣傳多。(IG圖片)
阮政峰同蘇韻姿拍「愛的手勢舞」好合拍，仲輕輕吻女方。(IG截圖)
好sweet!!
阿融話﹕「嗰晚大約9點鐘，佢哋唔係拍緊嘢，只係見佢哋攞住部細機互影，見到蘇韻姿孭住阮政峰，男嘅仲摸女嘅塊面。」之後佢哋唔係影相，但仍然手拖住手，仲情深款款對望，讀者阿融話﹕「都有人認得佢哋，咁樣拖手咪即係間接公開(戀情)咗囉？！」對拍拖傳聞，蘇韻姿回覆傳媒時表示：「唔好意思呀，我唔係咁方便回覆你哋。」
(蘋果日報)
