李思捷最近再嘗導演滋味，執導家庭喜劇《一家大晒》，搵嚟狄龍、元秋、蘇玉華等人參與。他日前接受專訪時，已謂想拍家庭電影好耐：「細個已經睇家庭電影大，《八星報喜》、《富貴逼人》系列、《家有喜事》，細個年年都好期待一家大細去睇家庭喜劇，2000年後少咗呢類電影，有機會做導演，我好想帶番呢種情懷出嚟。」
《一》片背後有唔少嘢想表達，思捷指：「一家人冇手機喺身，去享受一套電影，一家人食飯係好溫暖，近年缺乏咗。科技係為世界做好多嘢，但小朋友是否對住電話WhatsApp就算？80年代冇手機年代，一家人攬住好溫暖嘅感覺。」李思捷話，今次做導演困難不大，而且佢好鍾意做功課，每樣嘢都有晒準備：「如果去到先決定就玩完，所以一早請晒所有演員圍讀咗兩次，大家有好親切感，又演到我想要嘅角色。最大問題係冬天拍，五點半就天黑，每日得幾個鐘，時間緊迫。」
要感動演員參演亦要下一番功夫，蘇玉華最初婉拒演出，她稱：「我初時叫佢搵第二個演，佢之前已做好準備，好想我快啲應承演，但我唔得。我要好清楚了解角色、有啲咩人參與，究竟我可唔可以做？我會唔會做得好？我會唔會幫你完成你想做嘅嘢係我最關注。拍電影機會我唔關注，原來擺我落去有好處，可以用我能力貢獻，令件事靚，係我最關心嘅事，經過深思熟慮，我應承咗思捷，感激佢帶我去電影世界。」
思捷話阿蘇演嘅家庭主婦角色好有層次感，女人唔單止為個家，自己內心世界想爆發俾老公睇到，佢讚阿蘇：「我諗唔到有邊個做得好過蘇玉華小姐，我嘅偶像係梅麗史翠普（Meryl Streep），佢就係我後生版嘅梅麗史翠普，做乜都得嘅呢個人。」
呢次演出仲有狂人林敏驄，思捷指阿驄係朋友，亦係一個失控嘅人，思捷話：「有咩麻煩嘢，身為朋友我慣咗，喺現場我忍佢嘅，佢本身都係咁嘅人，所以我要接受佢。但係拍攝時間有限，有時我都會頂住度氣，為咗件事拍靚佢。基本上三分一笑位都喺林敏驄度，背後拍攝有幾唔開心、幾辛酸幾不滿我都要包容，因為佢係我朋友。我成日提佢，呢齣係家庭戲，啲音唔好咁歪，出唔到街，有時一班人食飯講就好笑，去到家庭戲就㩒佢。」
(蘋果日報)
