【曾嫁黎小田】關菊英大方承認密友:人生伴侶無性別之分

    喺90年代移民咗去溫哥華嘅菊姐關菊英,喺07年喺《溏心風暴》嘅細契角色而多咗人氣,連帶佢嘅私生活都受到關注。

    菊姐24歲嗰年同黎小田結婚,但呢段婚姻只係維持咗好短時間。2007年,有傳菊姐同已故「公仔麵」大王周文軒嘅侄女周偉利(Willy)交往,直到08年,菊姐大方承認Willy嘅密友地位:「最緊要對我好錫我,男女冇所謂。」日前菊姐接受商台《1圈圈》訪問,重提當年與Willy關係曝光,佢話:「唔介意,如果唔係,我都唔會照直講喇,不過希望大家可以俾啲空間我哋。」


    當年菊姐話過,只要對佢好,男女都冇所謂。到咗今日,菊姐依然好認同,仲話人生伴侶無性別之分:「最緊要係返到屋企有個伴,講吓今天發生啲乜嘢事,無論係開心、唔開心嘅嘢,都可以拎出嚟一齊分享。當你有病嘅時候,有一個人去關心你、陪你去睇醫生,噓寒問暖,呢啲係親人先會做得到!」

    菊姐仲話:「我嘅父母喺2013及2014年先後過身,嗰陣有啲失落。人生事業高高低低,我都冇乜嘢強求,最重要係身邊有個人,好似親人咁錫我!」早前曾經有傳菊姐同Willy註冊結婚,菊姐笑笑口話:「呢啲只係傳言,對我嚟講,冇再婚嘅需要!」

    (蘋果日報)

    SHARE