袁嘉敏、筱靖、林雅詩及王敏德同太太馬詩慧等今晚喺又一城出席電影《縮水人間》首映禮。袁嘉敏以貼身低胸裙現身，佢話最近忙於去中國登台：「1月有10個活動，唱下啲經典同勵志歌，好似《紅日》咁，搞到把聲都沙咗，起身以為自己變咗男人。」
袁嘉敏話想拍啲冇必要裸露嘅戲
筱靖話媽咪介紹男仔俾佢
同場仲有林雅詩
王敏德一家
問袁嘉敏狂接登台活動咪賺夠首期？佢話：「希望啦，之前睇過啲200幾呎嘅樓，但係諗唔到點裝修，同埋唔想困住自己喺個盒度。」袁嘉敏又話上年為咗出書，推咗4、5部電影：「我覺得個形式同風格唔係咁啱我，希望可以拍啲冇必要裸露鏡頭嗰啲。」至於同場嘅筱靖就話嚟緊情人節係年廿九，會返廣州陪屋企人過農曆新年，問筱靖係咪帶埋男朋友去？佢笑謂：「我自己返去先，媽咪成日都催我，話要生仔就快啲。」筱靖仲爆媽媽介紹嘅男仔好唔掂：「最離譜試過介紹個年紀細過我，但個樣大過我嘅。媽咪鍾意睇學歷，我就叫佢去買兩張證書啦。」
(蘋果日報)
