趙學而同建築師老公蘇國基結婚7年，去年蘇國基被雜誌爆約會女鄰居，學而力撐老公：「好無聊嘅事，大家啲朋友嚟，我唔覺得藝人嘅另一半唔可以有異性朋友，正常朋友交往我唔覺乜問題。」
係咪百分百相信老公？學而眼神肯定、聲線鏗鏘：「好多香港人都會知道趙學而係一個幾兇狠幾辣嘅人，我又唔係成日出去做嘢，我唔出去做嘅時候，老公都喺我身邊噃，而我老公嘅朋友我都識，咁你話，我老公可以走得出我邊一隻手指隙呢！」
巴辣人妻學而教大家點箍老公：「喺呢個年代，唔係話我結咗婚就要箍得對方好緊，反而你用呢個方法去箍，家庭問題更加嚴重。嗱！我呢種放鬆方式，並唔係代表隻眼開隻眼閉，因為呢個只係斬腳指避沙蟲方法，我係精明時代女性，對感情對另一半係充滿柔韌性，我話畀你聽，我絕對唔係妒忌心好強嘅人，如果我老公選擇揀我，其他女人我係唔會驚嘅。」
學而叮囑所有女人：「如果你選擇得同另一半結婚，絕對要對自己有信心，識得處理同異性嘅相處學問，呢個學問非常緊要，如果妒忌心強嘅人，好容易搞到自己唔開心，令到另一半唔開心，影響到大家關係，呢樣需要時間同空間，唔好用守舊嘅思維去睇男女相處，我嘅音樂都有帶出呢啲訊息，尤其係97年《尋開心》開始，了解我音樂嘅觀眾都知我對情感係比較西方思想，睇得開放啲，但唔等同我唔着緊。」
夫妻感情冇因報道發生小風波，蘇國基更為老婆圓紅館夢感開心，學而表示：「佢係非常之緊張同雀躍，畀足夠空間我，令我有足夠時間休息，上次九展騷佢好緊張，不停催促我踩單單跑步練氣，今次佢覺得可以畀我緩和，畀空間我去諗自己想做嘅嘢，因為佢睇到呢幾年我不斷出去唱歌，體力可以應付到。」老公有冇陪你做運動？學而讚老公：「佢有㗎，佢係一個幾貼心嘅人。」
(蘋果日報)
