旁邊仲有一個BB仔嘅圖案，興奮公布太太懷孕嘅喜訊，仲係小王子。。。
台灣歌手林宥嘉（Yoga）與太太丁文琪（Kiki）就喺去年1月登記結婚，正式成為夫妻！向來恩愛非常嘅二人，今日Yoga出席活動時，就送上小禮物及卡片，上面仲寫住「新年快樂，2018也請多多指教」，仲附上佢同太太Kiki嘅簽名，旁邊仲有一個BB仔嘅圖案，興奮公布太太懷孕嘅喜訊，仲係小王子，不過就仲未改名，仲透露太太已懷胎3個多月添！
另外，Yoga仲分享當時太太畀佢睇驗孕棒嘅情況，仲話當太太話佢知懷孕嘅時候，令佢嚇親。佢仲表示日前有陪太太去產檢，當透過超聲波聽到BB嘅心跳聲，真係覺得好感動，仲搞笑話：「聽到心跳聲非常想哭！」而Yoga亦表示Kiki預計7月生產，更將排開所有工作，陪伴老婆生產。有人問佢咩時候造人成功，佢就話應該唔係度蜜月時嘅事，佢估計喺屋企搞掂嘅，佢搞笑話：「小孩跟我一樣很愛家。」
Yoga又指Kiki近期害喜，對氣味非常敏感，所以有啲咩事都會盡量幫佢做，仲話因為太太剛懷孕，加上自己工作好忙，所以依家消息公布後，希望朋友可以多多幫忙。而Kiki近日喺社交網都係上載食物相，令網民猜測因為懷孕，所以食嘢多咗，總之恭喜晒！
（on.cc東網）
