胡杏兒喺舊年10月為老公李乘德（Philip）順產誕下重約8磅嘅「小王子」Brendan，Philip日前貼咗囝囝嘅相，BB正面樣首次曝光，佢仲透露囝囝嘅中文名叫李奕霆，之後杏兒亦分享咗一張攬咗寶貝仔嘅相兼留言：「每天起床最開心的就是見到你對著我甜甜的笑，每晚最享受的就是你乖乖的睡在我的胸口！媽媽愛你！」睇嚟杏兒好享受湊b生活。
今日有周刊報道，一向係都係工作狂嘅杏兒，本來計劃生B坐完月之後復出工作，不過o依家計劃似乎有變，報道話杏兒好享受湊B生活，而且仲有計劃即刻要追多個，所以呢個復出計劃暫時要擱置，報道仲話查實一直以嚟都有好多廣告商邀請佢哋母子檔出鏡，酬勞仲好好，不過杏兒話暫時都唔諗呢樣嘢，一來Brendan仲係好細，二來要得老公批准先成事，所以佢嘅經理人全部幫佢推晒！
日前杏兒仲俾人影到一家人去咗西貢行街，杏兒呢個新手媽媽嘅湊仔手勢姿勢好純熟，Philip就負責孭住bb周圍行，報道又話自從做咗爹哋Philip收工即刻返屋企湊仔，至於老婆係咪復出，Philip就冇乜意見，仲話杏兒做乜佢都支持喎！
其後杏兒接受周刊訪問，講到係咪為咗阿仔推job，佢話因為o依家餵緊人奶，好難離開太耐時間，之後又問佢係咪諗住全力造人，杏兒話一定會追多個，因為bb真係好得意同好好玩！
(蘋果日報)
