有「絕世好女友」之稱嘅唐詩詠，喺03年加入無綫之後，先後獲提名「飛躍進步女藝員」同女配角獎，直到2010年，詩詠終於拎到「飛躍進步」呢個獎，之後向女配角同女主角呢個目標進發！
近年無綫嘅花旦小生個個都離巢北上賺人仔，雖然少咗好多有份量嘅演員助陣，不過變相亦俾咗唔少機會啲其他人，詩詠喺前年終於《鐵馬戰車》爭逐女主角，但五強不入，反而殺入「最受歡迎電視女角色」五強，可惜最終鎩羽而歸。不過正所謂機會係留俾有準備嘅人，舊年詩詠拍咗《不懂撒嬌的女人》
結果佢喺劇中Cherry嘅角色出奇地討好，令到佢今年憑《不懂》角逐視后、最受歡迎電視女角色同最受歡迎電視拍檔，佢封視后嘅呼聲，一度直迫同劇嘅宣萱！今次嘅對手相當強勁，除咗宣萱之外，仲有鮑起靜、李司棋呢啲前輩級對手，詩詠當然不敢怠慢，最近密密曝光有新聞，之前就傳舊愛洪永城幫佢拉票，後來更發展到俾傳媒影到一齊食飯，似是復合有機，人氣更盛！
據悉今次仲有一招殺手鐧，就係佢嗰份藝員約，其實詩詠嘅約就到期喇，無綫亦一早搵佢傾續約，但唐詩詠遲遲未動筆，似乎好大機會同獎項有關！唔經唔覺，詩詠效力無綫13年，今次似乎係最接近「視后」呢個獎，詩詠日前接受傳媒訪問，佢話：「係，第一次最接近，最多人談論，好開心，都係網民俾我，佢哋鍾意個角色，俾咗我好大信心，第一次咁接近已經好好。」
之不過一講到奪「視后」嘅信心，詩詠竟然話：「無喇！呢一刻都唔諗，成個過程好開心，等緊去參加頒獎禮。」點解呀！網民咁撐，佢話：「今年有份提名嘅女藝人，影后又有，之前攞過都有，好多勁人，前輩。」至於有傳佢就快滿約，按過往嘅傳言，續約係應該獎拎，詩詠就否認話：「唔係，仲有一段長時間，唔駛擔心，扭計攞獎？邊有呢啲嘢？扭蛋咩！今次係全民投票。」詩詠呢一刻只一樣嘢令佢緊張：「我o依家最緊張係件衫嚟唔嚟，因為最緊要靚。」
(蘋果日報)
