可嵐4年前因家暴跟前夫尤子威分居，之後一直為兒子嘅撫養權同贍養費爭拗，仲搞到要對薄公堂，噚晚可嵐出席中環《解憂雜貨店》優先場報喜，佢話：「今日都有件開心事，終於有件事解決咗，同前夫調解咗，係好融洽情況下完結件事。」
咁係咪如你所願？完滿解決，佢笑笑口話：「之前要上法庭，o依家唔使喇！已經解決晒，我哋之間有個小朋友，最近睇好多唔開心新聞，都係圍繞單親家庭嘅問題，婚姻完結，令家庭唔完整，但係原來父母嘅愛，唔一定要一個家庭，父母唔識相處，唔代表唔幸福，o依家小朋友見到Daddy好開心，屋企見到媽咪好快樂，咁都唔係一個錯嘅解決方法，仔跟自己，老公會分擔贍養費，已經唔再抱怨，打官司都打咗一年。」
咁同前夫係咪再見亦是朋友？「都可以係，用時間沖淡好多嘢，當中成長好多，大家都為小朋友學習。」至於係咪可以準備好投入新感情？佢話：「早日開會，想做一個講座，係探討兩性關係，結婚易，離婚好難，原來離婚係好複雜，對於將來嘅感情，自己期望遇到一個相處得好好嘅人，唔一定要結婚，唔需要一張紙，最緊要係可以相處同溝通。」
(蘋果日報)
