79年憑麗的電視劇《天蠶變》爆紅嘅徐少強
徐少強（右二）拍《天蠶變》拍到爆紅，之後仲演過唔少大俠片。（《天蠶變之再與天比高》劇照）
經歷過3段婚姻，佢同第二任太太雪梨89年分開之後，04年同細佢30年嘅大陸女舞蹈員結婚，兩個人再生咗一子一女，大女今年13歲，細仔今年6歲。
去年4月大陸傳媒報道話徐少強背住老婆搭上23歲大陸艷星羅雲琦，事後徐少強即刻同呢個艷星劃清界線，話同對方只係合作過拍戲，由於女方好主動經常黐埋佢度，又話要做自己助理，自己為免誤會，所以早已契咗女方做契妹。
雖然傳出緋聞，但未有影響徐大俠同太太夫妻感情，早年已經移居大陸嘅徐少強，日前同太太及一對子女現身香港享受天倫樂。
當日下晝5點，《蘋果》記者喺中環AIA友邦歐陸嘉年華見到徐少強同太太企喺吸煙區食煙，喺5分鐘內快食兩支煙，睇嚟煙癮都好大。食完煙之後，佢哋又企喺馬戲團門口好似等人咁，但見時間未到，兩公婆於是周圍行睇嘢。
大俠打電話既姿態都好特別
徐太行埋去睇咗幾眼
食完煙就入場玩
兩公婆除咗有福同享，有煙都要一齊煲？
去左food court 坐陣密密傾
行到攰時再坐喺food court，老婆買嘢俾徐少強飲，對老公好體貼。再過一陣，徐少強起身四圍行，睇人玩機動遊戲，同老婆再行咗個圈之後，前前後後等咗個半鐘，再喺馬戲團門口會合一個女仔同個小朋友。
個小朋友一出嚟就扭肚餓，徐少強於是同老婆帶小朋友買棉花糖，食完之後就離開。《蘋果》記者其後聯絡徐少強，問到佢同太太去嘉年華嘅事，佢話：「係呀，我同太太同啲細路，同佢哋返嚟過聖誕過元旦之嘛，元旦後走。我喺橫店開緊工，放假幾日陪佢哋。」
問佢最近拍咩戲？佢話：「拍緊李仁港嗰套《刺局》(電影)，又拍緊橫店一套《木槿花之西月錦繡》，有兩個戲喺身。」會唔會返香港拍嘢？徐少強話：「或者會。」講到之前佢同大陸艷星傳緋聞，徐少強就話：「嗰啲笑話嚟嘅，佢都猛話唔好意思，佢話唔係佢傳出嚟，係上邊啲記者亂咁寫。」
(蘋果日報)
