兩間免費電視台無綫同ViuTV今日都有派藝人參予公益金百萬行活動，黃心美同黃心穎兩姊妹非首次同場，心美爆心穎有兩年踢極都唔知醒，知佢今年參加活動好suprise，心穎話﹕「所以我今年專登唔瞓，都有啲攰㗎，但嚟到又好興奮，因為好似好多同事嚟晨運咁，好開心。」
黃心穎表示新年其間只得三日在港休息，唔會去旅行，會唔會去男友馬國明屋企拜年呢？心穎話可能啦。黃心美即笑住話：「見到你哋咁樣問佢，佢答唔出我好開心，叫馬明嚟我哋屋企拜年啦，我歡迎，帶多啲利是嚟派。」聽落家姐接受咗馬國明？黃心穎話：「從來唔理佢諗乜。」不過黃心穎話冇特別問過父母，但父母應該對馬國明印象唔錯，之前都一齊食過飯。
問到會唔會支持馬國明憑《降魔的》登上視帝寶座？心穎話﹕「我做都要做咗，有投畀佢。反而佢好平常心，我都戥佢緊張，但佢對獎項冇特別想攞，good luck啦，希望見證到佢攞獎一刻。」對於ViuTV比往年多咗人參加，黃心美話：「 係呀，愈嚟愈多人，簽咗好多新人我都唔知道。」
被笑指身為ViuTV一姐都唔知？心美話：「一姐係唔理呢啲事。」黃心穎反寸家姐：「我識哂啲同事，因為我唔係一姐。」
(蘋果日報)
