歌手張紋嘉（Crystal）將於2月8至11日演出舞台劇，她坦言已隔了一段時間沒有做過，這次在劇中飾演與爸爸沒見面20年的女兒：「係個台灣女仔，飛嚟香港搵做攝影師嘅爸爸，佢好想知點解爸爸會離開自己，同埋點解自己對婚姻同愛情都有恐懼。」她指故事由外國劇本改編，加上已經演出多次，所以劇情和人物都很實在：「我覺得係個好大挑戰，珠玉在前，有人做過就覺得一定要做得好啲先得。」
歌手張紋嘉
提到其中一幕要與20年沒見的爸爸擁抱，她直言尷尬：「佢哋問我係咪冇攬過我阿爸，我話我長大之後真係冇。我成日同朋友攬，但從來冇對父母做過呢樣嘢。」她形容家人比較傳統，不習慣用身體及語言表達愛意，通常以禮物代表關心，結果她被劇團各人歧視：「我有諗係咪要同我阿爸講我好錫佢，或者試吓攬住佢，但我驚佢嚇親，問我做咩！」說到父母早已離異，並各自有新家庭，Crystal坦言較少與他們見面，但打算鼓起勇氣表達愛意。問到可會經常傾偈？她表示每次一起吃飯都會傾很多，又會互傳訊息：「以前就少啲，依家佢哋喺電視見到我細個嘅偶像郭富城，就會Send相畀我睇，我哋好似變咗朋友咁溝通。雖然有時佢哋會話我，但呢樣嘢都幾得意。」她笑說自己和父母都愛報喜不報憂，不想別人擔心：「有時見到佢哋身體冇以前咁好，我會鬧佢哋，叫佢哋唔好食某啲嘢，但佢哋好少將煩惱講畀我聽，可能要由婆婆或者其他屋企人口中先知佢哋點解食咁多藥。」
至於排練時間緊迫，她大呼緊張：「舞台劇係一Take過，要對走位、角色個Flow好清晰，每一場就好似重新嚟過咁。仲要同燈光、後台、其他演員互相配合，好多嘢都要好精準，一錯就會影響到大家，所以要排練好長時間。」雖然現在她每日都要一早起身排戲，但她表示已經習慣，並且很享受用這麼多時間深入地尋找角色。問到喜歡戲劇的原因？她指初時是為了嘗試另一種生活，後來就發現演戲是情感的出口：「現實中我會收埋自己，唔會挖啲感受出嚟講，但做戲可以藉角色抒發感受。當我了解戲劇多咗，就覺得係一種好高技巧嘅藝術，將自己成個人抽出嚟去代入角色，呢樣嘢好Amazing。如果大家願意睇，我絕對想一生都做呢樣嘢。自己好鍾意睇電影同舞台劇，見到啲演員好勁，好真實咁演繹個角色，我都好想自己做到。」
Crystal 笑說自己和父母都愛報喜不報憂
(ON.CC)
