無綫早前喺深宵時段重播《壹號皇庭》系列，結果搞到唔少觀眾夜麻麻都keep住煲劇，重拾當年那些年嘅回憶，宣萱日前喺中環接受訪問，亦都有講起呢件事，佢話：「聽到《壹號》重播嘅收視好，有6點幾，即係有差唔多40萬觀眾唔瞓都要睇，真係開心！」
一直以嚟，宣萱都唔係一個鍾意拍續集嘅人，佢話：「你問我最好係唔好開，見好就收，無謂拍到爛，唯一係可以開嘅係《壹號》，呢個題材可以再拍！」宣萱話：「嗰陣我自己睇番，如果可以有第6輯，簡直情天霹靂，但係呢個世界上，只係得鄧特希可以，任何一個人都儲唔到呢班人。」唔知宣萱到時又會唔會拍呢？佢話：「會，一定會，不過主要班底係呢一班人，我o依家睇番都會笑，大家好有默契，喺o依家嘅情況嚟講，難再遇到嘅默契！」
早前《壹號皇庭》班底RE-u，帶來大大的震撼。 （互聯網圖片）
宣萱覺得最難得嘅係，大家都係嗰個年代，又有共同理念：「o依家同後生拍嘢，喺佢哋身上學嘢，學吓啲潮語，update自己，始終拍劇希望可以有多啲經典嘢，對白、對手乜都好，呢個夢想唔係冇可能，呢班人唔係向錢看，反而大家好希望追求成果，同享受過程！」
宣萱話期待《壹號皇庭》第六輯！
宣萱仲話：「o依家都希望可以過呢啲開心嘅生活，每一個劇都有一啲好好嘅回憶，收視嘅嘢唔關我嘅事，得與唔得我唔係好理，只係希望有對白。啲人問我有邊個角色特別鍾意，我冇角色唔鍾意，個個我都覺得OK。當然有啲係特別鍾意，過程基本上係開心，唔好成日都做類同嘅嘢。」
幸好歐陽震華髮型keep住冇點變，但喺Season 5 蔣志光死咗，咁點算好？ (劇照)
(蘋果日報)
