已經係三子之母嘅陳伶俐，上周四啱啱過咗41歲生日，08年同林敏驄離婚，結束10年婚姻關係嘅佢，12年低調再嫁新加坡隱形富豪胡嘉烈後人劉頌銘，並再誕下一子。喺人哋眼中嘅少奶奶，婚後未有加入闊太行列瘋狂high tea，佢開完畫廊後，最近喺銅鑼灣開食店，將新加坡宮保美食帶嚟香港，伶俐日前喺銅鑼灣新開嘅餐廳內接受《蘋果》專訪，問到佢點解有少奶唔做要做生意，仲要係最辛苦嘅飲食業？佢笑言：「因為我好鍾意做嘢，唔做唔係陳伶俐。」
自稱潮州妹嘅伶俐話父母喺佢細個時開百貨公司，一家人發揮潮州人精神，個個都好團結：「爸爸改我個名叫伶俐，都係想我聰明啲，我聽番家人講，話我3歲就識找錢俾人，人哋買7蚊嘢俾10蚊我，我真係識找3蚊俾人。」不過，提到離世多年嘅爸爸，伶俐忽然感觸落淚哽咽：「老竇留低幾個字俾我，就係『膽大、心細、臉皮厚』，而我夠膽大同臉皮厚，但唔夠心細，成日想做成績俾爸爸睇。」
咁o依家做到爸爸嘅3項格言未？佢即笑稱：「都有喇，自己都四十有一，識練多啲EQ，做嘢唔好咁急，唔好咁衝動，開畫廊都學咗好多嘢。」伶俐又爆自己廿幾歲已經有做生意，但係當時仲係藝員，所以唔係太多人知：「以前有做產品贊助，同埋做下公關，接啲job做。(有冇得罪人？）都有㗎，我一向好直，以前人人都係咁，後來知道要圓滑，說話有技巧，唔好得罪人，慢慢之中學到嘢，好彩我臉皮厚，會走埋去道歉，最緊要用誠意。」
講到開專門賣新加坡宮保美食嘅食店，伶俐話：「我同老公好鍾意食嘢，一年前喺新加坡遇到呢個師傅，終於用誠意打動到佢嚟香港，奶奶o依家係fans，一、兩日就嚟一次，以前要飛去新加坡食。」講到家庭方面，問到佢有冇為3個囝囝計劃將來？佢笑言：「可能我好細個就做阿媽，係責任，佢哋係原動力，令自己俾心機做嘢，不論成功與否，但過程小朋友睇到媽咪嘅努力都會欣賞，要身體力行，講係冇用，佢見到你有幾辛苦有幾努力，佢會更錫你，一齊起起落落，開心唔開心都同佢哋分享。」
咁有冇將爸爸嘅座右銘傳承落去？伶俐話：「我唔會做怪獸，好似自己鍾意做生意都想去做，最重要係back up佢哋，o依家小朋友好幸福，但唔捱得，好多小朋友有工人姐姐，冇乜經歷過，父母又同佢哋安排晒好多嘢，佢哋就好似冇咗自己咁，咁樣父母同小朋友都好痛苦，可能父母係錫佢哋，但小朋友可能唔想做一啲嘢。」伶俐又表示，只要囝囝唔做壞事、唔吸毒就冇所謂。
(蘋果日報)
