混血名模Amanda S.早年與意大利籍嘅Christian Cappelli離婚後，已覓得第二春，與外籍富豪男友Sam感情穩定。但Sam開設嘅服飾及貿易公司最近被指欠債6000萬港元，曾遭人淋紅油，今早更有苦主上門追債。
Amanda S.今日喺尖沙嘴出席護膚品牌活動時，對於男友公司欠債一事，佢話：「我唔知道，上星期有記者話俾我聽，因為11月開始，爸爸癌症復發，應該差唔多，Sam唔想我擔心，所以冇同我講。」此時，Amanda S講起爸爸病況，即時忍唔住眼濕濕，心情平伏少少，佢繼續話：「0依家經濟唔係咁好，我聽人講做生意有問題係經常發生。」
有冇問過Sam？Amanda S.話：「佢唔想講，我都唔好意思問。」欠債千萬喎？佢指：「生意就係生意，我唔知大生意點做，但聽講好多香港出名嘅生意人都會欠債幾億，Sam做生意20幾年。」
男友有冇問借錢？Amanda S.表示：「佢冇問過我借，從來都冇，佢好gentlemen。」如果Sam開口問呢？佢直言肯定Sam唔會問。至於Sam嘅公司被人淋紅油，Amanda S.話真係唔知情，佢透露爸爸好鍾意泰國，11月同12月都有喺泰國陪佢，Amanda S.哽咽話﹕「做完香港嘅工作，我都會過去繼續陪佢。」
（蘋果日報）
