胡楓（修哥） 下月10及11日將於紅館舉行《胡楓86破晒紀錄演唱會2018》，佢近日已積極備戰，修哥揚言要挑戰健力士紀錄大全，成為高齡紅館藝人。
修哥之前講過，佢唔會自己請嘉賓，o依家似乎好多嘉賓都係不請自來，其中一個就係張家輝，佢一知道修哥開騷，就即刻打電話俾修哥，仲自薦做嘉賓，除咗家輝，仲有劉美君同張達明都話要預埋佢哋一份。至於一班契仔，好似黎明
張學友
佢哋有嘢做，來唔到，但係會準備驚喜送俾破紀錄嘅契爺修哥。早前修哥就去K房練歌，唱咗學友〈夕陽醉了〉、黎明〈哪有一天不想你〉，仲有徐小鳳金曲等等，佢一邊唱一邊跳，活力十足：「上次80歲演唱會沒有跳，今次何麗全說一定要跳，還找了Sunny Wong做排舞師，我都好期待學新舞步。有隻獨舞，有隻就同森森斑斑跳。」
日前家輝就同修哥一齊練歌
另外，修哥演唱會嘅歌衫係由陳華國設計，音樂交俾契仔周啟生，佢話：「陳華國幫好多大星做舞台衫，啟生搞音樂我又放心，今次有歌有舞有笑話，我做得開心，都希望大家睇得開心。」
修哥契仔周啟生做音樂，張家輝話做嘉賓。
為咗呢個演唱會，修哥都好乖，已經冇食煎炸嘢，飲湯水，食生果養聲，佢唯一擔心就係唔記得歌詞：「上到台我都盡量唔睇提詞機，要練記憶力嘛，不過好多後生都唔記得歌詞，哈哈，如果到時真係忘記歌詞，笑吓就冇事啦。」
修哥為個唱積極備戰
(蘋果日報)
