日前係「玉女掌門人」周慧敏（Vivian）同倪震結婚9周年紀念，Vivian喺facebook激罕高調放閃，貼上當年兩人簽紙結婚嘅相片，寫道：「存在如同一軀體，苦與樂同一口徑，大家不論異同，仍然為愛尊敬。」
呢4句取自Vivian歌曲《肋骨》嘅歌詞，上帝從亞當身體取出一條肋骨，創造出夏娃，成為亞當嘅終生伴侶。身為虔誠教徒嘅Vivian，藉《肋骨》比喻自己跟倪震嘅婚姻，甜蜜滿瀉。
當年兩人經歷幾許風雨，曾孔雀開屏嘅倪震學懂珍借，最終由分到婚娶到Vivian做老婆，兩人相依共度9周年，網友留言祝福：「長長久久 白頭到老」、「一個凹，一個凸，咁先能夠緊扣一起，互相學習，互補不足。祝願你們兩口子永遠恩愛！」
問到有乜回應太太，倪震昨日話﹕「十萬天荒愛未老。」冧爆老婆之餘，還趁機幫老婆嘅演唱會《一萬天荒愛未老》宣傳。
(蘋果日報)
