太陽娛樂老闆周焯華（洗米華）同老婆洗米嫂陳慧玲（Heidi）、以及Mandy Lieu嘅關係擾攘多年，時不時就有世界各地嘅讀者見到洗米華同老婆又或者係Mandy四圍去，聖誕嘅時候佢就陪Mandy Lieu喺馬爾代夫玩。
不過噚晚，洗米華陪住洗米嫂同埋三個仔女，仲有洗米華爸爸，喺香港現身，仲好溫馨咁一齊行街。
《蘋果》就見到佢哋一家人喺銅鑼灣食完晚飯，就去咗時代廣場行街，佢哋行完一間舖頭，洗米華就自己一個先行出嚟，之後就到洗米嫂、大仔周柏豪、大女周梓潼同埋細女周羨潼，一家人邊行邊傾，有講有笑。
隨行仲有幾位疑似保鑣、公關。但可能佢哋一家唔係好熟時代廣場，因為佢哋走嘅時候，就迷咗路，本來要去到後門等車，但就行咗去化妝品部，搵咗一陣路，嗰幾位疑似保鑣、公關先話畀佢哋知行錯路，去返後門。
喺出後門嘅時候，洗米華就同梓潼、柏豪兩名子女好好傾，而洗米嫂就抱住細女，冇行出後門住，之後洗米華就發現記者，個樣有少少唔同咗，之後仲拎咗支煙出嚟，不過記者同佢揮手打招呼之後，心情好番啲。
架車過咗一陣就到，洗米華就同梓潼、柏豪坐一部車，而洗米嫂就抱住細女坐另一部車。
(蘋果日報)
