資深演員林俊賢女兒林鈺洧（Denice），昨日與邵音音拍攝奇妙電視節目，邵音音更爆與Denice同樣患心臟病，拍攝中途差點病發，幸好雙雙及時食藥保住命仔。而單身的Denice面紅紅指與圈外異性曖昧多時，但事業剛起步，暫不想談兒女私情。
林鈺洧、邵音音與吳智杰昨日為奇妙電視節目《使乜驚大兩Gen》到上環摩羅街取景，兩位年輕人對該處的事物感新鮮，趁未埋位時四圍逛，邵音音透露該節目談及代溝問題，但與年輕人合作完全冇問題。
做唔到「肉女」
邵音音更化身導演，着Denice穿透明睡衣扮性感女星狄娜，豈料對方竟把睡衣外穿，Denice說：「我真係做唔到『肉女』，聯想唔到，不過同音音姐開工好開心，成日笑到流眼水。」但邵音音卻爆昨晨與Denice開工時雙雙心口痛，差點心臟病發，Denice說：「呢個病係隔代遺傳，我小學時已經知道有，試過喺學校暈低，所以成日袋住啲藥喺身，頭先食咗藥休息一陣冇事，可能焗親啫！（爸爸知唔知？）佢唔知，我冇特別講。」邵音音則說：「呢個病唔知幾時病發，惟有袋住藥喺身，頭先我哋真係嚇親工作人員，以前拍戲都試過咁，當時嚇到導演郭子健即刻搵人送我返屋企。」二人亦有交流患病心得。
對於節目於本月底煞科，Denice透露聖誕已跟家人到曼谷旅遊，將在港度過農曆新年，問到曼谷之行可有男友同行？Denice自言目前單身，卻有曖昧對象，她面紅紅地說：「曖昧咗好耐，有啲悶，但依家事業剛起步，又唔多想拍拖住囉！」
林鈺洧最近就同邵音音一齊拍節目。
邵音音就爆兩個都喺拍攝中途差啲病發！
好彩大家及時食藥保住命仔！
佢就話小學嗰時已經知自己有心臟病，所以都會袋住啲藥喺身隨時救命！
三人齊齊揀衫，林鈺洧做乜皺晒眉？
林鈺洧 （右）
(ON.CC)
