藝人伍詠薇（伍姑娘）及鄧月平到銅鑼灣宣傳奇妙電視節目《四小時生活圈》，伍姑娘在台上分享在日本拍節目經歷，提到老公練海棠時，她笑言：「佢有佢玩，我有我玩囉！」
伍姑娘解釋謂：「我講笑啫！我哋兩公婆關係都就嚟踏入19年，可以好似朋友咁講笑，如果係真嘅話，點可以攞出嚟講？直頭火都嚟，衝晒上頭啦！不過今次去日本拍節目，真係大陣仗，淨係裝衫都五個篋，另一個篋就裝塊化妝鏡，兩邊有燈嗰種，要包到好實，咁又用咗一個篋，總共六個篋！呢個節目係好嘅，有得玩有得食，仲可以了解日本買樓投資嘅嘢，我都學到唔少！」
鄧月平則在台灣以兔女郎扮相賣臭豆腐，她說：「生意好好呀，好多人嚟買，直頭比原先老闆嘅生意仲要多！當我化好晒兔女郎裝扮走出酒店，咁啱撞到何潤東，於是我同麥子樂就自我介紹，話我哋係嚟自香港嘅新人，嚟台灣拍節目，真係約都冇咁啱！」
(on.cc東網)
