藝人原子鏸（Marsha）去年4月接受訪問時講過同一位來自摩洛哥嘅男士拍緊拖，仲話男友已經過咗媽咪鄭佩佩嗰關，又自爆隨時Ready嫁！
原子鏸嘅舊愛鄧健泓上年十二月同石詠莉拉埋天窗，39歲原子鏸都有好消息傳出，佢獲男友求婚呀！鄭佩佩喺微博上載阿女被求婚嘅短片，片段中原子鏸同男友激咀，真係甜到漏！作為媽咪嘅鄭佩佩留言話：「這是我們今年第一個喜訊！」
而原子鏸亦開心上載同男友合照，佢留言話：「I said “yes” just 2 hrs before the start of 2018」而佢被求婚嘅地點正係男友家鄉摩洛哥，別具意義！
舊愛鄧健泓以短訊回覆，佢話：「祝她幸福快樂，Happy for her.」
記者聯絡鄭佩佩，並透過胞妹鄭保佩回覆：「1月6日係佩佩生日，每年呢個時候都會去旅行，依家佩佩同Marsha飛緊去倫敦，所以將電話飛咗我度，10號先返香港。（恭喜晒Marsha結婚！）多謝，未咁快，啱啱先求婚。（你喺現場？）唔係，佢哋喺歐洲，31號除夕派對當晚，原本佢男友獲空手道師傅頒發Purple Belt，喺呢個咁重要嘅moment，佢男友就跪地求婚，Marsha好surprise！」
(on.cc東網)
