11年喺神劇《天與地》演家明一角而俾人認識嘅張景淳，可惜後繼冇力，之後事業就冇乜起色，反而戀情就好精采，好似喺舊年5月，當時佢同華姐女友宋雙佳冷戰，佢就同前HotCha成員張惠雅（Regen）拍劇而撻着，但係Regen本身又有一個男友，於是形成一個複雜嘅四角戀。
跟住《蘋果》又影到張景淳喊晒咁o氹女友，希望佢回心轉意。
不過呢段情最後都係告吹咗，今日有周刊報道，張景淳同星夢新寵菊梓喬(Hana)撻着，日前影到佢哋兩個人鬼祟去咗又一城睇戲，嗰陣佢哋兩個刻意走得好開，張景淳仲唔俾女友行近自己身邊，就算散場嘅時候，亦都刻意先等其他人離開，佢哋行返入商場之後，最初亦都係保持距離，不過當發現商場冇人，佢哋兩個先放心越行越埋兼且仲一支水兩份飲。
跟住佢哋兩個行出商場外面，Hana上咗張景淳架車，負責揸車直返去張景淳喺將軍澳嘅屋企過夜，Hana似乎好熟路，似乎係經常出入呢個地方。
報道仲話張景淳同Hana係識於微時，兩個人一直係好朋友，直到張景淳同宋雙佳分咗手之後，佢哋先走埋一齊。
(蘋果日報)
