藝人陳敏之接受電台節目訪問，提到她最近有兩套劇集熱播，敏之表示好開心，因為有很多人留意：「等陣會出席《溏心風暴3》嘅祝捷會，有好多人都話我同唐文龍嘅感情線有好多驚喜，睇到好肉緊。」
過節諗咗囝囝先
當講起囝囝雷子樂（冬至）時，敏之即甜笑謂：「啱啱同佢過咗聖誕同除夕，全部都係去人哋屋企慶祝開House Party，噚日（1日）就去咗梁烈唯（唯唯）屋企，聖誕節就去咗個好朋友屋企，依家個個都會有小朋友都會帶埋出嚟開大食會，一班小朋友就會喺地下爬、玩，繼生完之後終於可以正正式式感受到氣氛。
梁烈唯與其女兒（資料圖片）
要做一個媽咪要做嘅活動，就係帶自己嘅BB去小朋友嘅聚會，見到啲小朋友跑嚟跑去係好熱鬧，但同之前兩個人拍拖係兩碼子嘅事。」
她又謂現時過節都是以小朋友角度出發先：「囝囝係喺冬至出世，啱啱幫佢搞咗個生日會，都係為咗佢整好多波波池同埋滑梯，完全係兒童王國咁，以前邊到有咁？以前生日都係食個飯，簡簡單單，兩公婆去吓玩就算。」
專心工作暫不追B
問到2018年會否再追多個陪子樂？敏之表示隨緣，暫時都未有任何計劃：「自己都鍾意做嘢，啱啱先拍完一套劇，我諗呢年都係專注番做嘢嗰度，始終囝囝先至1歲，依家未識行啦，睇吓等佢返咗學之後先至諗吓追唔追多個陪佢，因為太細個自己都好辛苦，真係好難（兼顧）。教育一個小朋友唔係講玩，如果依家突然多一個，我諗我會好Crazy『嘩！點算呀？點算呀？』，見好朋友都係起碼隔一、兩年，等佢起碼講到嘢（先至再生）。依家囝囝都淨係識講『媽媽』、『爸爸』、『Mum Mum』（食嘢）。
（佢第一個叫嘅係邊個？）媽媽，佢依家好好笑，你唔畀佢想玩嘅嘢，佢就會好快咁講『媽…媽媽呀… 媽！』嚟求救，平時叫佢嗌我就喺度扮嘢扮怕羞，一要求救或者想食嘢就叫。都好想Enjoy吓呢段時間，如果有多個就好難Focus喺佢度，先同囝囝拍拖先。」
最愛聞BB香
敏之又笑言日日都攬着囝囝入睡：「聞佢啲BB味好香，同埋佢隻手仔搭喺自己度呢，雖然會壓到痺晒，但呢啲快樂係邊度都搵唔到，真係好正！到佢大啲點會咁瞓？佢會有佢嘅世界。生小朋友最開心就係3歲前，似蜜月期咁。」
(東方日報)
