「未有叱咤，佢已經叱咤樂壇」，形容緊嘅係五十歲先至第一次拎叱咤男歌手金獎嘅李克勤。
出道三十年嘅李克勤今晚再次踏上叱咤頒獎台，佢上台前先轉身向歌手及觀眾致謝。上台後，他先深呼吸了一口氣：「多謝商台。如果用奧斯卡嚟比喻叱咤嘅話
有啲歌手係年年都有提名，有啲隔年就攞獎，好似梅麗史翠普咁，我明顯唔係呢啲歌手啦；亦有啲歌手係好似里安納度咁，提名咗好多年，但好多年都同獎項擦身而過。終於，可以攞到一次，大家都為佢鼓掌嘅。」
全場即報以熱烈掌聲。克勤續說：「我唔係傻嘅，我梗係唔係里安納度啦。我有自知之明0架！我係咩呢？我應該係奇連伊士活，其實已經唔係好記得佢有冇攞過，但如果呢個年紀攞到，都值得俾啲掌聲。」
一語雙關。再次贏得全場掌聲。「我首先要多謝我舊公司，我舊經理人公司，因為我覺得呢個獎係有累積分嘅。衷心要多謝譚詠麟先生。你會為我高興。」頓了頓，克勤百般感觸，強忍淚水，全場再鼓掌打氣。之後克勤向英皇致謝，笑言多謝公司提供一個有上限嘅無限創作空間我。
「梗係啦，做隻碟成千萬都俾咩？梗係有上限啦。多謝咁多位對我呢個新人咁好，咁錫我！」「我最多謝我嘅歌迷，係呀，佢哋跟咗我幾廿年0架喇，啲女仔，佢哋跟我仲耐過跟佢老公呀，不過你唔使擔心，你老公唔會呷醋，我唔會愛你0架，但我會好珍惜你俾我嘅愛嘅。」
「最後我一定要多謝我屋企人，同埋好多人話叱咤嘅獎好難攞，我見到好多歌手每一年喺台下都未必攞到佢哋想攞嘅獎，我想話李克勤都得，你哋都得。」
(蘋果日報/香港01)
