去年因為拍劇集《不懂撒嬌的女人》而人氣急升嘅袁文傑，噚晚同拍拖多年嘅女友張潔蓮（Jackeline）首次孖住喺將軍澳出席除夕倒數活動，同場仲有蕭正楠同黃翠如、袁偉豪同張寶兒與及羅天宇同湯洛雯幾對情侶。
袁文傑喺台上唱哥哥張國榮嘅歌送俾女友，今年係佢哋拍拖7周年，亦都係佢哋第一次情侶檔出席活動，問到酬勞會唔會好可觀，袁文傑話：「呢個工作喺幾個月前已經接咗，呢個第一次都忍咗口好耐，真係好難忘，酬勞都好好，我已經將一大半俾咗佢。」
拍拖7年，話晒七年之癢，唔知喺2018年又有冇啲乜嘢計劃呢？袁文傑好坦白話：「其實我哋都有啲打算，應該會好快可以向大家公佈，最主要都唔想屋企人等得太耐，希望佢哋又放心，大家又開心，我想喺農曆新年前能夠有啲答案！」
不過Jackeline話男友仲未求婚：「我都希望有一個特別嘅求婚方式。」唔知袁文傑會唔會即晚求婚？佢面紅紅咁話：「唔會，唔會，如果係我唔會咁嘅樣喇！」至於新年願望，佢話：「除咗希望喺新一年同Jackeline有突破性嘅進展之外，希望佢都身體健康！」
(蘋果日報)
