踏入新一年，今日沙田舉行元旦日賽馬，洪金寶嘅愛駒「飛雲寶」同吳若希嘅愛駒「愛馬劍」都分別出賽，佢哋亦有到現場支持。
洪金寶戴住太陽眼鏡現身，見記者拍照時，行色匆匆未有停下接受訪問，不過問到對愛駒有冇信心？大哥大就笑住話：「有啲啦。」再問可有留意洪天明被指喺上海拖女嘅報道？佢即有啲忟憎反問記者：「你有冇睇到吖？你有睇到呀。咁你唔去問問佢，隻眼咁犀利。」
而周家蔚亦係凌晨喺ig貼上全家大合照，以行動證明支持老公，仲留言話：「Hung Family wish everyone a Happy New Year!!!! 」
至於吳若希同老公何兆鴻（Alex）齊齊到馬場，吳若希表示會支持愛駒：「點都會支持吓，不過我哋隻馬比較新，要時間操練，希望每場都有進步啦。」
佢又話自己賭運麻麻，老公會好運啲，身旁嘅Alex即刻話：「我唔賭馬，不過會同朋友玩吓嘅。」至於囡囡淼淼呢？吳若希話唔想佢坐船嚟：「今晚都返去同老爺奶奶食飯。噚晚倒數都賣甩個女，去咗朋友屋企玩，玩到天光，所以而家好眼瞓。」
(蘋果日報)
