蕭正楠（Edwin）同黃翠如噚晚又合體喺將軍澳出席除夕倒數活動，佢哋喺台上唱吓歌又玩吓遊戲，本來大會安排Edwin送花俾翠如，但係翠如話：「你之前喺活動上送咗好多次花俾我，不如今次到我送俾你喇！」點知Edwin抵死話叫女友跪低先喇，翠如即刻話：「你發夢喇你！」
Edwin同翠如話今次係佢哋第一次做倒數活動，翠如仲話：「今次仲係第一次一齊過節，之前逢親節日大家都要各自各做嘢。
Edwin同翠如話今次係佢哋第一次做倒數活動，翠如仲話：「今次仲係第一次一齊過節，之前逢親節日大家都要各自各做嘢。翠如即刻望住男友話：「恭喜你呀！恭喜你見到我呀！佢o依家拍緊劇，如果唔係佢可以度到期，今晚都見佢唔到。」Edwin就話：「我推咗好多job嚟先接到呢個，係買一送一，佢係送嗰個！」唔知今年佢哋又有冇計劃結婚，翠如話：「又講求婚，都已經講咗一年喎！我諗吓，睇吓佢表現點先。」
之前Edwin曾經彈女友廚藝麻麻，搞到翠如嬲嬲，但係日前佢喺網上貼咗一張太陽蛋嘅相片兼話：「老懷安慰！」
Edwin：「今次隻蛋真係搭得杯落，嗰日我好趕時間返工，突然間有一隻好完整嘅蛋拎咗出嚟，搞到我好感慨，真係唔捨得食，我想鑲起佢！」
聽到男友話即刻加晒分，由唔合格變合格，翠如笑笑口望一望男友，唔知有冇考慮學煮嘢食？佢話：「可以學吓，但係我唔覺得自己差喎！我覺得自己冇問題！」之後翠如話自己最近拿手整四川麻辣撈麵，仲越講越興奮，點知Edwin喺側邊擰晒頭話：「何必呢你，何必要講出嚟俾人笑呢？我都忍咗咁耐唔講，你係都要講出嚟！」聽到男友咁彈自己，翠如尷尷尬尬話自己冇嘢講！
(蘋果日報)
