27歲前無綫新聞小花陳嘉倩，去年11月被踢爆與「凸肚男」陳志遠(Stephen)拍拖，男方隨即被起底，指佢自稱係馬主，又曾涉禁錮，及與人有金錢糾紛。聽落又真係幾令人擔心嘅……，如果你係嘉倩BB嘅朋友，你又會點做呢？
《蘋果》日前收到嘉倩BB嘅閨蜜爆料，指嘉倩BB得知男友過去之後，依然死心塌地咁愛對方。不過，嘉倩早前懷疑自己有身孕，男方知道後非常抗拒，立即趕佢出家門，即係之前被影過佢哋一齊返去嘅坪輋村屋，嘉倩當然好傷心啦。嘉倩BB嘅閨蜜話﹕「好似有咗個幾兩個月，大家都勸佢離開個男人，但嘉倩就覺得對方冇問題。依家被人趕咗出門口，佢就唔肯聽電話，屋企又唔返，又唔畀我哋知佢住邊，好似失蹤咁。」
據聞上月(12月)9日，嘉倩因為太唔開心，所以向港台請病假唔開咪，閨蜜繼續爆料話﹕「其實條仔平時係軟飯王，出街食飯話請朋友，其實都係嘉倩負責畀錢。外間又以為佢送好多嘢畀嘉倩，但其實所有名牌嘢，都係嘉倩自己畀錢買。」
閨蜜仲提供咗一張嘉倩自己畀錢買鞋嘅單據，真係冇使男人一分一毫咁話。
《大氣候》主持兼監製胡世傑則回覆《蘋果》話：「嘉倩嗰日(12月9日)身體不適，佢仍繼續做緊主持。」記者致電嘉倩求證懷孕傳聞，佢噚日以短訊回覆話﹕「絕對沒有這樣的事，我和他已經分開了一段時間，不明白為什麼會有人無中生有，謝謝關心。」而陳志遠就一直冇聽電話。
(蘋果日報)
