42歲的「萬人迷」碧咸（David Beckham）出名為廿四孝老竇，對孻女夏柏舒芬（Harper Seven）更加錫到燶，而Victoria近日就於社交網Instagram上載一段老公抱住愛女揸哥爾夫球車的黑白影片，與粉絲開心Share兩父女的溫馨時刻，雖然夏柏於片中密密冧笑，Victoria又留言指囡囡好愛爸爸，大晒溫情，不過人仔細細，只有6歲的夏柏被拍到手揸軚盤，左扭右扭，有份「揸車」，即時惹來網民熱論！
不少人留言鬧爆碧咸兩公婆的做法唔對路，有人留言：「非常不負責任！」另有人就表示：「真係夏柏揸車？望落車速好快！」不過都有人力撐碧咸，自言小時都有試過與爸爸同樣做，又指碧咸主力控制油門，應該無問題。其實碧咸兩公婆不時被質疑湊仔女的做法，近年分別曾因畀愛女食奶嘴、畀囝囝告斯（Cruz）出道以及與仔女咀對咀錫錫而被網民批評。
二人近日帶4個仔女到佛羅里達州度假過節，碧咸另有上載與三個囝囝戲水的照片。
(on.cc東網)
