38歲嘅林峯，同吳千語情變已經傳咗一段時間，一時傳女方另覓富商男友，一時就傳林峯之前因為工作太忙而忽略女友，搞到千語BB嗌分手，阿峯即刻作出補救，抽啲時間陪下女友，但係始終聚少離多，再加上千語BB嘅工作發展幾好，受到大陸劇組嘅重視，激發咗佢嘅事業心，希望做好啲證明自己。
及後林峯現身接受傳媒訪問時，講到比佢細14年嘅千語BB五年情變，亦一反常態咁冷淡。問到係咪感情轉淡？林峯話：「我哋間中都有聯絡。」會唔會好可惜呀？林峯自動tag咗去講工作。
昨晚吳千語到屯門出席活動（佢聽日會返橫店繼續拍劇），被問及情變傳聞，以及林峯回應時態度冷淡，千語話：「其實好似佢咁講咁樣，間唔中都有聯絡。其實圍繞我哋嘅新聞唔係結婚就係生仔，今次傳我哋分手，總之就唔講太多喇。」
咁你哋依家關係係點？吳千語依然不肯正面回應，只係話：「依家工作對我嚟講好緊要，真係冇乜時間，總之工作為主。」那情侶關係是否沒變？吳千語唔知點解，去到呢個moment仍然要帶大家遊花園，就好似天下間所有疑似情變嘅藝人一樣答：「請俾啲空間我哋。我哋工作上各有各忙，2018年都會放多啲時間喺工作上。」
好，轉個問題：若果依家話林峯係你男朋友，啱唔啱？吳千語冇正面答。
咁，你依家有冇人追呀？「冇喎！」富商呢？「我就唔知喇，但我身邊就冇出現乜嘢富商。」又話2017年都係返過嚟香港幾次，每次只停留一兩日。佢又話今次返港都有同林峯講，但林峯就唔喺香港。林峯之前受訪時話知道吳千語行蹤，但今次呢，千語聲稱有搵林峯，但問佢林峯喺邊？佢只係答到「唔喺香港」，咁即係在哪兒呢？千語表示不知道。咁……查實係咪真係有聯絡0架？千語堅稱有：「我哋有短訊聯絡。」
(蘋果日報)
