星夢歌手「木偶哥」林師傑出席星夢歌手的慶功宴時，被唱片公司老闆何哲圖大爆他已向女友歐陽巧瑩求婚成功！
在慶功宴的短片上，林師傑、谷微、鄭俊弘、何雁詩及胡鴻鈞等邊食邊做直播，林師傑表示：「今年要認真多謝老闆，因為畀咗好多鼓勵我。」在有人問「幾時結婚呀？」全場人即時起哄大叫「結婚，結婚」，他表現得相當尷尬，說：「老闆多謝晒！」
之後將咪交畀何哲圖，而何哲圖就話：「結婚呢樣嘢已經同師傑溝通咗啦，我哋。」全場拍掌，何哲圖再話：「我同阿師傑講，如果遇到珍惜嘅女朋友就要珍惜喇，要大膽啲、要勇敢去講畀人聽，拍咗幾年拖要同對方講要定落嚟，咁師傑鼓起勇氣同佢好好嘅女朋友講咗啦。」
而林師傑承認：「依家正式宣布，我已經封咗盤，所以大家啦，盡情去妒忌歐陽巧瑩啦，羡慕佢啦，你哋冇機會，我已經將個人留咗畀佢，哈哈。真係開心，老闆好關心我呢件事，畀咗我好大信心，我冇諗過婚姻，成日以為要搵好晒啲錢，買到樓，搞好晒先去做，係老闆畀咗個好大啟發我，仲幫我擇晒日，係好感動成件事。」
何哲圖再說：「我同師傑話男人唔使搵到晒啲錢先去搵老婆，應該講一齊去捱先最開心。」林師傑又說多謝女友：「喺一個唔係咁靚嘅時候，歐陽巧瑩入咗我生命，同我拍拖，三年後準備籌備結婚啦。」他又說因未搞詳情，結婚日子容後公布。
(on.cc東網)
