一連11場嘅楊千嬅跨年演唱會《三二一Go!演唱會 2017》，噚晚已經去到第7晚，演唱會亦進入倒數階段，千嬅每晚完騷，都會嘅社交網同大家緬懷吓當晚演唱會，噚晚都唔例外，佢喺ig到貼咗一張演出時嘅相，留言話：「Day7 done … 莫名的失落，#楊千嬅三二一go演唱會2017 #lonely #countdown」，演唱會仲有四場就結束，千嬅已經好唔捨得個舞台同啲歌迷。
睇番千嬅嘅ig，見到佢每晚都會貼圖，亦有時會上載短片，但並唔係演唱會嘅情況，只係佢喺後台嘅情況，好似佢為演唱會做準備嘅片咁，但就完全冇場內演出進行中嘅片，連晚晚親身去支持老婆嘅丁子高亦一樣，只係貼圖。但係千嬅嘅演唱會，真係一票難求。
好多歌迷都想記錄低千嬅嘅演出，當中不乏有人拍片、影片，之前亦發生一啲搞笑事件，就係有朋友仔想拍片，竟然被大會嘅攝錄機影到，當時寰亞發言人梁小姐話：「其實每次都有一啲人睇演唱會嗰陣用手機拍拍拍拍，所以我哋每次都請大量保安捉人，一見有人拍就勸佢停止，通常一般都聽嘅。」
而噚晚人妻胡杏兒就去咗睇千嬅演唱會，雖然本身唔屬水瓶座嘅佢，當聽到千嬅唱《可惜我是水瓶座》時，都好興奮咁拍片，仲將短片喺社交平台同大家分享，完騷佢仲去咗後台搵千嬅合照打卡㖭！
完騷後佢就去咗後台影合照。(ig圖片)
(蘋果日報)
