「發嫂」陳薈蓮前日58歲生日，發哥周潤發約咗一班好友喺尖沙嘴為發嫂食飯慶祝，兩人着黑色情侶裝出席襯到絕，留長咗頭髮嘅發哥精神飽滿，更開腔為老婆唱生日快樂歌：「Happy Brithday to周太」，笑容甜到漏嘅發嫂挨實老公，幸福滿瀉！
兩人情侶裝現身
能夠做發哥背後女人，咁多年打點一切無所不能，發嫂似足「神奇女俠」冇得頂，所以發嫂收到「神奇女俠」造型蛋糕，興致勃勃咁研究，發哥亦忍唔住讚呢個寓意老婆係「神奇女俠」嘅蛋糕：「好靚呀，靚到不得了！」
呢個蛋糕好有意思，寓意發嫂係「神奇女俠」
發哥不停叫老婆：「許願啦！」當發嫂閉目許下生日願望後，發哥捉實老婆隻手齊齊切蛋糕：「生日一刀，心想事成！」友人不停叫發哥錫錫發嫂，發哥霸氣答：「得啦得啦！」
捉住發嫂隻手切蛋糕，發哥話咁樣可以心想事成。
全程笑唔停嘅發嫂對住鏡頭飛吻。跟住發哥送上一紥鮮花，友人又叫揸花影相。度過開心一晚嘅發嫂表示嫁咗發哥之後，每年生日都係同老公一齊過，生命中有幸認識到老公，發嫂接受《蘋果》訪問表示：「我生日都係接近年尾，每年都係一樣希望，就係我所識嘅朋友，包括我家人同自己，都有好好嘅身體，先可以追求我哋嘅理想；至於我嘅生日願望呢，就係將來有機會，我希望可以再讀書，呢個moment我有三樣嘢想學，就係business、體育同教育，體育係我未讀過嘅嘢，自己亦好希望教小朋友讀書，到時睇我嘅時間可以讀邊個課程，咁多年就係諗咗呢三方面。」
(蘋果日報)
