劉青雲同郭藹明結咗婚19年，不過佢哋依然好鬼sweet，係圈中出咗名嘅模範夫婦！青雲喺15年嘅金像獎拎影帝嘅時候，佢對住老婆冧爆咁話：「多謝我太太，女性觀眾鍾意聽，每次當我揸住太空船，飛到宇宙唔知邊度，你總有辦法令我安全返回地球。」郭藹明聽完之後梗係感動到喊，仲惹嚟唔少女性葡萄嘅目光！
今日有周刊報道，日前郭藹明同青雲去咗西貢橕枱腳，雖然餐廳坐滿人，但係郭藹明依然懶理，經常用好仰慕嘅眼光望實老公，離開餐廳嘅時候，手拖手邊行邊傾，講到興起，仲好肉緊咁攬實老公，青雲當然好熱情咁回咀！
最難得嘅係，今年郭藹明已經50歲，不過佢依然keep得好好，而且佢仲有少女心，又會成日用心心眼望實個老公，難怪結咗婚咁多年，依然keep得好激情！
郭藹明曾經講過，之前好努力經營婚姻，o依家係收成期，所有嘢係得來不易，好似青雲對飲食有要求，但係佢嘅廚藝麻麻，所以青雲唔係好鍾意喺屋企食飯，之後郭藹明好努力咁去學整嘢食，結果o依家成日見到佢哋去買餸返屋企玩煮飯仔，青雲仲會喺朋友面前讚老婆嘅廚藝！郭藹明仲話青雲係一個唔肯妥協就唔肯妥協嘅人，佢從來都唔會囉唆同管住青雲，通常等佢撞板之後，先叫老公用自己嘅方法！
(蘋果日報)
