雖然未到情人節，但要甜蜜幾時都係情人節啦！
鄭嘉穎同細佢22年嘅陳凱琳(Grace)拍拖兩年，感情越來越穩定，早前嘉穎出活動，仲話唔排除有「意外」。今個聖誕節，佢哋一齊出埠旅行，上周六(23號)被讀者影到現身香港機場離境閘口，但就唔知去邊個地方？！
噚日《蘋果》又收到讀者陳小姐透過「爆相爆片」報料，話24號平安夜喺溫哥華機場遇到佢哋。陳小姐表示當晚航班延遲起飛，要到溫哥華時間晚上7點左右先到達，陳小姐話攞行李嘅時候，嘉穎一直企喺好遠嘅地方，但一見到行李出嚟，就好快咁行過去女友身邊幫忙，陳小姐話﹕「我覺得嘉穎cool得嚟都好gentlemen。」
上次陳凱琳同屋企人坐廉航出事，畀人話有特權，今次佢哋決定坐business，搭長途機可以舒服啲。陳小姐話﹕「佢哋係等到其他人入晒機艙先入，見佢哋有傾有講，都幾sweet架。」Grace喺5歲時候舉家移民溫哥華，直至當選香港小姐，一家人又多咗時間留喺香港。
今次Grace決定孖嘉穎一齊返溫哥華，應該都係要帶嘉穎見吓屋企人同朋友。陳小姐表示﹕「其實溫哥華好多華人，聽朋友講，佢(Grace)父母最近都返咗嚟溫哥華，今次嘉穎可能去見家長。」有男友陪住，Grace都心情大靚，噚日喺ig晒愛，雖然冇貼同嘉穎嘅親蜜合照，但簡單一張食物相，喺Grace眼中都係冧到爆。
佢留言﹕「沒有什麼比起與一生中最甜蜜的人一起過聖誕節更甜蜜了，簡單就是最好，你同意嗎？」、「在假期卡路里全部不算數，所以吃吧。」
(蘋果日報)
