台灣天王周杰倫（周董）同老婆昆凌結婚以來一直表現恩愛，仲生咗一對子女，湊成「好」字，絕對係美滿家庭。最近周董同昆凌趁住聖誕假期，出國旅行過白色聖誕之餘，同時慶祝結婚周年紀念。二人連日來都有更新社交網，邊旅行邊上載靚相同粉絲與眾同樂。
先見到昆凌上載咗白茫茫嘅機場雪地相，仲有多張極光相，唔少網民問佢哋係咪去咗北歐旅行。
但係隨後昆凌同周董上載喺一條布滿燈飾嘅大街上影嘅相，有眼利網民見到街道牌有漢字，都好疑惑佢哋究竟去咗邊度慶祝結婚周年，唔通去咗內地？
見到相中昆凌打扮得充滿少女味，而周董就戴住黑色口罩，周董留言：「結婚周年快樂 @hannah_quinlivan 也祝大家聖誕節快樂喔」
雖然未見到一對子女嘅蹤影，但係見到佢哋都有tag子女名「hathawayromeo」嘅標籤，相信子女都有同行一齊過聖誕！
(on.cc東網)
