楊洛婷（Rabee’a）喺今年9月14日為老公、樂隊Dear Jane主音黃天翱（Tim）誕下囡囡Tanya，產後Rabee’a已經好快復出，而爹哋Tim亦努力搵奶粉錢，仲要幫手湊女。
眨吓眼Tanya已經100日大，一星期前佢跟咗媽咪同婆婆返加拿大過聖誕，收到好多禮物，日前Tanya仲見到佢人生第一場雪。
昨日Rabee’a喺Instagram貼相，係着住裙仔嘅Tanya，身旁仲有個插住「100」蠟燭嘅蛋糕，相信係Tanya等影相時郁過手仔，所以佢手上同條裙仔都沾到忌廉。
Rabee’a落hashtag時，有以英文提到「希望很快可以與爸爸一起慶祝」…而爹哋阿Tim亦真係好快覆，佢留言簡而精，「Daddy misses you!」3粒字都夠晒sweet！
而Rabee’a今日較早前，亦貼咗家庭大合照，但老公未飛到去加拿大點搞好？正所謂「一個都不能少」，Rabee’a喺相度做咗手腳，令全家福可以齊人現身！
有唔少網民仲留言問佢點整㖭，非常搞笑。
(蘋果日報)
