陳曼娜（Manna）個女鄭祖兒（Joie）去年跟上市公司董事Dicky結婚之後，Joie今年8月26日誕下千金Kaelyn ，初時花名叫「棉花糖」。
Manna噚晚為孫女擺百日宴，請咗胡楓（修哥）、羅霖、安德尊、林建明等一班老友出席，之後修哥仲幫「棉花糖」改咗名，o依家乳名叫「小豹妹」。
陳曼娜孫女小豹妹，o依家肥肥白白，係因為婆婆悉心照顧咋。
Manna今日接受《蘋果》訪問時，話自己最近轉咗做保母湊BB，事關佢朋友本來介紹咗個中年陪月俾佢個女，點知個陪月唔稱職，湊B時好唔衛生，甚至用尿水幫BB沖涼，所以最後佢哋炒咗個陪月，由Manna自己落手落腳湊孫女。
「佢嚟做嘢時我哋感覺佢（陪月）唔稱職，我哋大家都擔心，因為好忙，成日唔喺屋企，惟有裝閉路電視，結果發現咗佢好唔乾淨、唔衛生，我個女婿好心痛，晚晚都瞓唔着，本來我唔湊孫，只係玩孫，結果我承擔呢個重任，我話：『我嚟啦！』
Manna話：「佢換片時幫BB搽嘢唔洗手，幫BB沖涼時，BB瀨尿瀨咗落個盆度，佢唔換過盆乾淨嘅水照幫BB沖涼，真係好離譜，搞到BB全身皮膚敏感，我真係好心痛。」
Manna話佢湊番個孫已經兩個幾月，依家請咗菲律賓工人專責湊孫，咁Manna可以休息一下。此外，Manna忠告大家：「我奉勸啲爸爸媽媽，如果唔係太忙、可以照顧到BB嘅話，最好自己照顧，如果唔係唔幸運請到個唔好嘅保母，令到小朋友健康成長影響好大，我今次好大個教訓。」
早前小豹妹百日宴，一班長輩們爭住抱BB，修哥仲幫手改咗個乳名。
其實BB仲細，尿尿喺浴盆都係好正常。家長要留意番，BB衛生健康係好重要，但如果成盆水倒晒再嚟過，時間都要捉得好準，特別係喺呢啲咁凍嘅天氣下，如果唔係BB好易凍親0架。
圈中好友興奮送上祝福
(蘋果日報)
